cwrdd â’r tîm

Disgrifiad o’r rôl: Rwy'n cadw llygad ar yr holl elfennau amrywiol byrlymus, yn gweithio gydag arweinwyr tîm i sicrhau bod prosiectau ar y trywydd iawn, yn siarad â phartneriaid posibl ac yn arwain ar fethodoleg.

Amser gyda SSi: Rwy'n un o gyd-sylfaenwyr y cwmni – fe wnaethom ni ffurfio fel cwmni yn 2010 ar ôl lansio ein cwrs cyntaf yn 2009. Rhyddhawyd y cwrs cyntaf 4 diwrnod cyn i fy merch gael ei geni, ac wrth edrych yn ôl, doedd hynny ddim yr amseru perffaith!

Ieithoedd: Rwy’n siarad Cymraeg a Saesneg, a gallaf gynnal sgyrsiau pleserus (gyda digon o gamgymeriadau difyr) mewn Sbaeneg a Ffrangeg. Mae gen i dipyn o Eidaleg, Arabeg ac Almaeneg, ond dim digon i gynnal sgwrs. Gallaf hefyd ddweud 'Rydw i eisiau gwylio pêl-droed ar y penwythnos' mewn Manaweg, brawddeg a fyddai'n fwy defnyddiol pe bawn i'n hoffi pêl-droed.

Ffaith ddiddorol am Aran J: Rydw i wedi nofio gyda dolffiniaid yn Seland Newydd, wedi marchogaeth ceffyl trwy yr o sebras yn Zimbabwe, wedi gyrru o Seattle i Efrog Newydd, wedi byw yn yr Almaen, Portiwgal, Sri Lanka, Malaysia, Zimbabwe a Dubai, roeddwn yn arfer bod yn berchen ar beithon brenhinol o'r enw Dylan ac mae gen i hoffter angerddol o fyfyrdod.

Disgrifiad o’r rôl: Rwy'n cynorthwyo asiantaeth dylunio a marchnata i wella proffil ein cwmni. Rwy'n darparu cynnwys creadigol ar gyfer ein llwyfannau cyfryngau cymdeithasol, ein gwefan, cylchlythyr a’n cyfrif SoundCloud. Yn ogystal, rwy'n darparu recordiadau llais ar gyfer rhai o'n cyrsiau iaith.

Amser gyda SSi: Rwy’n gyd-sylfaenydd SSi, felly rwyf wedi bod yn rhan o’r cwmni ers Ionawr 2009.

Ieithoedd: Rwy’n siaradwr Cymraeg iaith gyntaf, ac ar hyn o bryd yn dysgu Ffrangeg. Mae gen i hefyd y ddealltwriaeth leiaf o Sbaeneg.

Ffaith ddiddorol am Catrin J: Roeddwn i’n arfer bod yn nani llawn amser i selebs, ond y dyddiau hyn dwi’n mwynhau her darlunio cain ac, fel un sy’n hoff o fyd natur, y rhyddid i gerdded yn y bryniau. Yn fy amser hamdden, rwy'n mwynhau ffotograffiaeth amatur a gwylio adar. Dw i’n ysgrifennu fy ail nofel Gymraeg ar hyn o bryd.

Disgrifiad o’r rôl: Rwy'n rhedeg swyddfa SSi. Rwy'n datblygu ac yn gweithredu systemau gweinyddol newydd, yn gofalu am gleientiaid SSi ac yn prosesu anfonebau a chyflogau. Mae fy set sgiliau yn seiliedig ar weinyddu, felly rwy'n aml yn ymateb i ymholiadau, sy'n fy nghadw ar flaenau fy nhraed a gwneud fy swydd yn ddiddorol.

Amser gyda SSi: Ers mis Gorffennaf 2021.

Ieithoedd: Cymraeg a Saesneg.

Ffaith ddiddorol am Catrin Rh: Roeddwn yn rhan allweddol o sefydlu Clwb Rhwyfo ym Moelfre, Ynys Môn ac mae 48 o aelodau bellach! O ddydd i ddydd dwi'n gweithio o stiwdio recordio dwi'n ei rhannu gyda fy ngŵr sy'n gerddor!

Disgrifiad o’r rôl: Fy mhrif rôl yw darparu cymorth dyddiol i bob dysgwr iaith, mynd i'r afael â'u hymholiadau, a blaenoriaethu materion technegol i'r Tîm Technoleg eu datrys. Rwy'n monitro ein cyfrif e-bost, yn cymryd rhan yn Sgwrs Gymunedol SSiW ar gyfer dysgwyr Cymraeg yn Slack, ac yn goruchwylio fforwm SSi. Yn ogystal, rwy'n cynorthwyo gyda phrofi deunydd cwrs newydd. Rwyf hefyd yn arwain sesiynau sgwrsio grŵp a phartner ar-lein ar Zoom, sy’n agored i bob dysgwr Cymraeg sydd wedi tanysgrifio.

Amser gyda SSi: Dechreuais ddysgu Cymraeg gyda SSiW yn 2009, a dechreuais wirfoddoli yn 2010, cyn dod yn rhan o’r tîm yn 2015.

Ieithoedd: Saesneg, Cymraeg, Esperanto, Sbaeneg, ychydig o Ffrangeg, Almaeneg a Japanaeg, a dwi'n dysgu Basgeg ar hyn o bryd.

Ffaith ddiddorol am Deborah M: Rydw i wedi bod yn grwydryn am y rhan fwyaf o fy oes – bum yn byw mewn 5 tŷ gwahanol a 2 wlad wahanol erbyn imi fod yn 5 mlwydd oed! Rwyf bellach yn byw yng Ngwlad y Basg, ac o ystyried faint o waith caled ac ymroddiad sydd ei angen i ddysgu Basgeg, nid wyf yn bwriadu i hynny fynd yn ofer trwy symud eto!

Disgrifiad o’r rôl: Fi sy’n bennaf gyfrifol am arwain y bwrdd a chyfrannu at gynllunio strategol.

Amser gyda SSi: Rwyf wedi bod gyda'r cwmni ers haf 2021.

Ieithoedd: Saesneg a Ffrangeg.

Ffaith ddiddorol am Dr Joanne P: Mae gen i raddau cyntaf (BSc Cyd-Anrh Bioleg Celloedd Meddygol a Biocemeg) ac ail raddau (PhD, Adran Meddygaeth) o Brifysgol Lerpwl. Mae teithiau cerdded ym myd natur yn falm i’m henaid, yn enwedig yng Ngogledd Cymru, ac rwy'n mwynhau bodloni fy ochr greadigol trwy baentio darluniau.

Disgrifiad o’r rôl: Dw i'n cynnal isadeiledd rhwydwaith a gweinyddion SSi, yn ysgrifennu meddalwedd cefn a blaen, ac yn darparu cymorth technegol ail-linell i ddysgwyr.

Amser gyda SSi: Dechreuais ar ddiwedd 2013, ond cyn hynny roeddwn i wedi bod yn aelod o gymuned SSi ers mis Ionawr 2010.

Ieithoedd: Saesneg fel mamiaith, rhugl yn y Gymraeg a'r Ffrangeg, gallu cynnal sgwrs yn Almaeneg ac Esperanto, goddefol yn bennaf mewn Sbaeneg ac Eidaleg. Dw i wedi cynnal sgyrsiau sylfaenol iawn yn Swedeg a Manaweg yn y gorffennol, ond mae'n debyg na allwn i wneud hynny erbyn hyn. Dw i wedi potsian ychydig gyda Ffinneg, Siapaneg, Pwyleg a Mandarin, ond ni allwn i ffurfio brawddeg go iawn i achub fy mywyd.

Ffaith ddiddorol am Ivan B: Dw i'n aml yn mwynhau dysgu am bethau trwy greu fy fersiynau fy hun ohonyn nhw.  Fel canlyniad, mae fy niddordebau yn cynnwys cyfansoddi cerddoriaeth, dylunio a gweithredu cyfrifiaduron retro, a dyfeisio ieithoedd artiffisial!

Disgrifiad o’r rôl: Dwi'n datblygu a gwella cynnwys cyrsiau, yn ysgrifennu sgriptiau ar gyfer ein system creu cyrsiau. Mae fy ngwaith yn cynnwys gwella cyrsiau presennol ac yn achlysurol adeiladu rhai newydd. Dwi'n gwrando ar adborth gan y tîm a'r dysgwyr i wneud y cyrsiau mor effeithiol â phosib.

Amser gyda SSi: Bum yn gwirfoddoli gyda SSi ers 2017, gan gymryd rhan mewn amrywiaeth eang o dasgau. Yn 2019 pan symudais i Gymru yn llawn amser, dechreuais gymryd rhan fwy blaengar gyda’r cwmni ac yn 2021 deuthum yn rhan o’r tîm yn swyddogol.

Ieithoedd: Cymraeg, Ffinneg, Saesneg ac Eidaleg. Rwyf hefyd wedi potsian gyda peth Swedeg, Sbaeneg, a Mandarin. Yn fwy diweddar, dwi wedi bod yn dysgu Japaneg trwy ein cwrs newydd.

Ffaith ddiddorol am Kai S: Roeddwn i wastad wedi bwriadu astudio mathemateg neu ffiseg yn y brifysgol, ond ar hap fe ddeuthum ar draws y Gymraeg a syrthio mewn cariad â hi. Yn fuan fe wnes i ymdrochi yn niwylliant Cymru a datblygu angerdd tuag at lenyddiaeth Gymraeg, felly fe newidiais fy meddwl ac yn y pen draw ymgeisio am gwrs gradd gwahanol.

Disgrifiad o’r rôl: wy'n goruchwylio ein partneriaethau a gwaith marchnata.

Amser gyda SSi: Ymunais yn swyddogol yn Haf 2021, ond cyn hynny cefais fy nghyflwyno i’r cwmni gan Global Welsh yn 2019 – yn anterth y pandemig Covid!

Ieithoedd: Saesneg a Ffrangeg a byddaf yn dechrau fy nghwrs SSiWelsh eleni!

Ffaith ddiddorol am Nick P: Fel rhywun sy’n wirion bost am chwaraeon rwyf wedi bod yn ddigon ffodus i fynychu nifer o rowndiau terfynol Cwpan y Byd pêl-droed, rygbi a chriced – yn anffodus, serch hynny, nid oes yr un ohonynt wedi cynnwys tîm o Gymru! Ond pwy a ŵyr beth a ddaw yn y dyfodol.

Disgrifiad o’r rôl: Rwy’n canolbwyntio ar gymhwyso’r fethodoleg SSI i ddysgu iaith mewn ysgolion, gan ddechrau gyda’r Gymraeg ar gyfer ysgolion cyfrwng Saesneg, a datblygu Saesneg ar gyfer ysgolion cyfrwng Tamil-, Sinhaleg- a Mandarin.

Amser gyda SSi: Dechreuais greu rhaglenni SSi arbrofol yn 2016 gyda Portiwgaleg a Tsieinëeg. Ymunais â'r cwmni yn swyddogol ym mis Mai 2021.

Ieithoedd: Sbaeneg, tipyn go lew o Tsieinëeg a Ffrangeg ac rwy'n gweithio ar y Gymraeg, Portiwgaleg ac Almaeneg

Ffaith ddiddorol am Tom C: Mae gen i 8 o blant, rydw i'n chwarae piano jazz ac rydw i wedi ysgrifennu llyfrau ar ddatrys problemau sydd wedi'u cyhoeddi mewn 6 iaith.